千慧學堂第六課 (蛇年話蛇台語文章之三：南投名間天受宮的靈蛇)

南投名間松柏嶺，除了奉祀玄天上帝母廟受天宮，猶有一間天受宮嘛是奉祀玄天上帝。誠神奇的是，每年肉粽節前後，攏有俗稱「帝爺公蛇」的大頭蛇會來天受宮報到，從 1979 年開始到2024 年為止，逐年攏按呢，干焦2023 年較宴出現。

 

靈蛇佇天受宮出現的短片

2022 年： https://youtu.be/40LflI45rkk

2024 年： https://youtu.be/X051LyRg4qU

 

2023 年肉粽節經過个外月，大頭蛇猶閣無來天受宮報到，予一寡民俗專家煩惱台灣凡勢會發生啥物大代誌。一直到 7 月 26 日 (農曆 6 月 9 日)， 廟方佇風颱前整理環境的時陣，發現大頭蛇恬恬仔覕佇神桌下，廟方當然足歡喜。宮主陳政雄講；「慢來總比無來較好」。到 2024 年 為止，靈蛇每年來天受宮報到的記錄已經延續到 45 年。

 

2022 年來天受宮的大頭蛇大約 2 公尺，佮舊年 (2024 年) 來彼尾長度差不多，毋過毋知是不是仝一尾。聽講這尾靈蛇予人發現了後，順神桌跤𬦰去桌頂，佇神桌佮神像之間趖來趖去，連鞭攑頭吐舌、連鞭向腰頕頭，若像咧向帝爺公參拜行禮，看起來不止仔神奇。毋過因為天受宮佇郊外，占地不止仔闊，四箍圍仔閣攏是山林無徛家，而且肉粽節前後拄好是大頭蛇的生湠季節，天氣變燒熱，需要揣較涼的所在覕熱。可能因為遮的原因，靈蛇才會每年肉粽節前後攏佇天受宮出現。若是因為按呢，這就不是神奇的代誌，佮神蹟無關係。

 

大頭蛇嘛號做絞花林蛇，學名是 Boiga kraepelini，因為頭較大，頷頸佮尾溜較幼長，才會號做大頭蛇，干焦小可有毒，毋過拄著的時陣猶是愛細膩注意，莫予伊咬著較好。