千慧學堂第五課 (蛇年話蛇台語文章之二：玄天上帝佮南投名間受天宮)

玄天上帝就是北極玄天上帝，本稱玄武大帝，為著欲避開佮大宋帝國皇帝趙玄朗名字中仝款有玄字，所以改稱真武大帝。玄天上帝有上帝公、上帝爺、帝爺、帝爺公、上帝爺公等等民間俗稱，猶閣有玄武神、真武神、元武神、元天上帝、開天大帝、北極大帝、北極佑聖真君、佑聖真君、北極蕩魔天尊等等其他稱呼，嘛四常予人簡稱做玄帝、北帝或者是黑帝。

 

玄天上帝是大明帝國鎮邦護國之神、戰神、以及降妖伏魔之神。伊嘛象徵天頂二十八座星宿中的北宮玄武，是統理北方道教大神，北方咧五行佮五色中屬於水佮黑色，所以玄天上帝嘛號做水黑帝，統領所有水族佮水上事物。玄天上帝咧台灣有足濟信眾，一般看著伊的神像大部份攏是手提北斗七星劍，頭鬃留長長閣褪赤跤，正跤踏蛇倒跤踏龜，看起來足威猛。

 

根據民間傳說，玄天上帝跤踏的蛇佮龜是對伊的腸仔佮胃變化來的；這个傳說講玄天上帝原本是一个刣豬的，有一工受到觀音菩薩點化，感覺家己殺業傷重，所以切腹自殺，並且將家己腹肚內的胃腸挖出來表示懺悔，因此得道升天，得著玉皇大帝封神，號做玄天上帝。玄天上帝挖出來的胃腸後來變做龜精佮蛇精危害人間，所以伊下凡將這兩隻妖精收伏，踏佇跤底，予𪜶無法度閣作怪。

 

根據「正統道藏」收錄的道教經典「元始天尊說北方真武妙經」，真武大帝原本毋是做刣豬的行業，伊本來是一位王子，天生根骨誠好，無想欲接王位，佇王宮內面修行四十二年後得道升天。玉皇上帝看重伊的勇猛，命令伊執鎮北方，統攝真武之位，斷絕天下妖邪。這篇經文描寫的真武大神「披髮跣足，踏騰蛇八卦神龜」，用白話講就是「頭鬃長長散散褪赤跤，跤踏騰蛇佮八卦神龜」。這號描寫符合台灣常在看會著的玄天上帝外型，但是經文中沒講著玄天上帝提啥物兵器。較合理的推測，騰蛇佮八卦神龜是玄天上帝的部將抑是跤力，𪜶佮玄天上帝𤆬領的「三十萬神將、六丁六甲、五雷神兵」攏會鬥陣出現。

 

台灣奉祀玄天上帝上出名宮廟是受天宮，這間廟佇南投縣名間鄉松柏嶺 (松柏坑)，對大明帝國末年創立到今已經三百六十外年。當初時有李、陳、謝、劉等姓人士對中國福建渡海來台灣，來到松柏坑開墾荒地。𪜶佇這馬受天宮面頭前看會著的山谷搭寮定居，奉祀故鄉迎請來上帝公香火，後來漸漸發展到這馬的規模。

 

受天宮是台灣萬外間奉祀玄天上帝宮廟的母廟，平均每年來進香的單位有四千至六千團，有遮爾仔濟進香團的宮廟佇臺灣誠罕見，而且來受天宮進香的一般攏干焦進香玄天上帝，但是去其他宮廟的通常攏進香幾若尊神明，這是受天宮佮其他宮廟誠無仝的所在。