千慧學堂第四課 (蛇年話蛇台語文章之一：台灣的毒蛇)

台灣有二十外種毒蛇，其中較捷拄著，若予𪜶咬著有可能誠傷重、甚至死亡的主要有六種陸蛇，包括青竹絲 (赤尾青竹絲)、龜殼花、百步蛇、目鏡蛇、雨傘節佮鎖鍊蛇 (鎖蛇)。

  

青竹絲是上捷看著的毒蛇，有紅目睭佮紅尾溜，身軀青蘢蘢 (照片一、二)。這種毒蛇分佈闊、數量濟、上捷咬著人，但是毒性低、出毒量少，致死率上低。

 

龜殼花頭殼三角形，身軀有誠濟敢若龜殼的黑色斑紋，咬傷率佮青竹絲差無偌濟。鎖鍊蛇頭殼嘛是三角形，身軀有誠濟草橄欖形斑紋，外表小可成龜殼花；這種毒蛇除了佇台灣東、南部平地，罕得看會著。

 

目鏡蛇嘛號做飯匙銃，上長會當大到二公尺，身軀表面主要是黑色，配一寡殕白色幼細環紋，其中頷頸的環紋較闊較明顯。這種蛇受氣攑頭的時，蛇頷頸會擴張變成前後扁平的形狀，這个時陣頷頸背部的白色環紋會變甲閣較明顯，敢若目鏡，所以叫做目鏡蛇。

 

雨傘節頭殼草橄欖形，上長會大到超過一公尺半，身驅有黑色佮白色的環紋輪流相接，交界明顯，白色環紋闊度較狹。百步蛇上長嘛會大到超過一公尺半，這種蛇頭殼三角形，上特別的是伊的吻端翹向頂懸，身軀從頷頸到尾溜有淺咖啡色佮黑邊的菱型斑，黑邊佇身軀兩爿形成咖啡色三角斑誠好認 (照片三、四)。

 

百步蛇身形、紋路攏真媠，毒性無足強，但是排毒量大，會當講是台灣上危險的毒蛇。排灣族佮魯凱族原住民一向攏足崇拜百步蛇，排灣族甚至共伊當做山神化身，而且野生百步蛇已經誠少、真罕得看會著，所以捌蛇的山友若佇山內拄著百步蛇，攏會感覺家己足好運，歡喜甲不得了。

 

六種主要毒蛇的毒性分做三型，青竹絲、龜殼花佮百步蛇屬於出血性，目鏡蛇佮雨傘節屬於神經性，鎖鍊蛇屬於出血性佮神經性混合型。遮的毒蛇內底雨傘節毒性上強，百步蛇致死率上懸，毋過𪜶的個性攏誠溫馴閣驚見笑，袂主動攻擊人，拄著的時陣毋免驚惶，只要恬恬仔離開就無代誌。龜殼花較歹處理，因為伊較歹性地，萬一拄著千萬毋通弄伊，趕緊離愈遠愈好。

 

萬一予毒蛇咬到，上緊佇 40 分到 72 小時內就有可能無命。所以若予毒蛇咬傷，就愛趕緊到病院接受注射抗蛇毒血清，才會當中和蛇毒減輕毒性症狀。現此時台灣有四種抗蛇毒血清，抗出血性血清主要治療青竹絲佮龜殼花咬傷，抗神經性血清主要治療目鏡蛇佮雨傘節咬傷，抗百步蛇血清專門用咧治療百步蛇咬傷，抗鎖鍊蛇血清是用咧治療鎖鍊蛇咬傷。除了六種主要毒蛇，台灣猶有帶紋赤蛇、環紋赤蛇、菊池氏龜殼花佮阿里山龜殼花四種毒性不止仔強的毒蛇，這寡毒蛇因為數量傷少，目前猶無法度研發出有效的蛇毒血清。

 

蛇毒佮抗蛇毒血清有專一性，若有看清楚是予啥物毒蛇咬著，對症注射抗蛇毒血清，一般壟會當順利復原。萬不幸注毋對射，無對症用藥，恐驚會造成閣較嚴重的傷害。譬如講 10 冬外前 (2014 年 8 月)， 桃園平鎮有一个二十捅歲的青年佇桃園復興東眼山予鎖鏈蛇咬傷，哪知醫師判斷錯誤，共伊注射對抗龜殼花咬傷的血清，造成傷喙顛倒愈惡化，而且彼个時陣台灣北部病院攏無鎖鏈蛇血清。這个青年人只好家己連夜南下，趕到「高雄醫學大學附屬醫院」就醫，注射鎖鏈蛇血清了後，好佳哉有及時保著一命。

 

製作抗蛇毒血清首先需要收集毒蛇的毒液，將無毒化處理的毒液注射到「血清馬」，等馬產生有夠濟的抗體了後才會當收集、純化馬血中的抗體，製成抗蛇毒血清。飼血清馬誠無簡單，收集馬血純化、製作抗蛇毒血清的過程閣誠複雜，製作成本不止仔懸。抗蛇毒血清是治療毒蛇咬傷的特異性藥物，使用不當會造成過敏性休克、呼吸困難、抑是血清病等等嚴重副作用，所以除非中毒誠深、誠嚴重，一般情形下袂當凊彩使用。