千慧學堂第二課 (台文短篇故事：主題如文前照片)

 

 

布農族的射日神話 (作者：謝文陽)

 

古早時代，天頂有兩粒日頭，所以無分日時暗時攏予人熱甲擋袂牢。有一工，有一个老母去田裡作穡，共紅嬰仔囥佇草堆頂懸，哪知煞去予日頭曝死。這个老母誠傷心，𪜶翁知影了後足生氣，就吩咐𪜶大漢囝去共日頭射落來，大漢囝接受吩咐，準備一寡粟仔就上路去矣。

 

這個大漢囝行到海邊準備欲射日頭，毋過日頭每一擺攏無按伊臆的所在出來。經過幾若工，總算等著日頭對伊臆的所在出現，伊射一箭就射著日頭的目睭。這粒受傷的日頭就是這馬的月娘。如今咱逐個月攏會拜月娘，就是為著欲安慰伊，以免伊閣心狂火著發出燒熱。

 

這个射日的勇士，拄離開厝的時，猶閣是一个囡仔，等伊轉到厝的時陣，已經變成一个頭鬃白蔥蔥的老大人。

 

以上所寫是布農族射日神話。